O Festival Reperkusión suma os sons vangardistas das bandas internacionais Dirty Honkers e N.O.A.H ao cartel da súa 12ª edición que terá lugar na Cidade dos Muchachos de Bemposta, en Ourense, os días 11, 12 e 13 de xullo. Os Dirty Honkers achegan ao cartel do Reperkusión o seu hip hop de última xeración, cos saxos e as voces de Israel, Canadá e Francia nunha mextura techno swing nacida en Berlín e os N.O.A.H sorprenderán ao público cunha elegante mestura de drum & bass e world music nacida a medio camiño entre Praga e Nova York. Estas novas bandas suman un aire de vangarda á proposta mestiza anunciada polo Festival hai unhas semanas, coa rumba rockeira de Muchachito y sus compadres, a percusión o movemento e a comedia visual de Crassh, os ritmos frenéticos de Cuchufellos e o garage-punk desenfadado dos Terbutalina.

Os próximos días daremos a coñecer o resto do cartel de concertos de noite do Festival Reperkusión que, como ven sendo habitual, serán a guinda dunha fin de semana completa, con actividades de día e de noite que non deixarán un momento para o aburrimento: humor, exposicións, teatro de rúa, pasarrúas, djs, obradoiros, mercadiño e o XII encontro de malabares e artes do circo. Mantemos a oferta de 20 € máis gastos de xestión o abono de tres días ou 25 €, se é con acceso á zona de acampada, ata o 15 de maio.


N.O.H.A. Noise of Human Art é unha banda cosmopolita, que traballa unha mestura aberta de xéneros musicais, dende o drum&bass ata a world music, sempre sobre uns ritmos cargados de enerxía. Os seus concertos son como tornados, que arrasan ao público dende o escenario coas súas potentes ondas de enerxía positiva, altamente contaxiosas. Dirixen a banda o saxofonista e compositor Philip Noha (de Praga) e máis o letrista, cantante e carismático líder MC Chevy (de Nova Iorque). A eles súmanse uns extraordinarios percusionista e baixista checos e unha voz curtida nos escenarios de medio mundo, a da lisboeta Carmen Guibá-Brown, que engade á poderosa proposta do grupo un combinado de sons jazzísticos, con aroma sesenteiro e alma de fado. Coa súa querencia pola música tradicional e a súa ollada multicultural, N.O.H.A. rompe todas as fronteiras dos xéneros musicais, dos países e dos continentes e conecta ao público cun ritmo poderoso e eléctrico, o ritmo natural de todas as festas, en todos os lugares e en todos os momentos da historia.

Os Dirty Honkers fan electro swing elevado á máxima potencia. A súa proposta nace do amor a partes iguais polo jazz clásico e máis pola música electrónica que sinten os seus integrantes, os saxofonistas Florent Mannant (de Francia) e Andrea Roberts (de Canadá) e máis o cantante e produtor de hip hop Gad Baruch Hinkis (de Israel). O trío coñeceuse en Berlín e dende alí levan cinco anos conquistando o mundo coa súa personalísima mestura de metais, voces e música electrónica e coa súa particular posta en escea, sorprendente e divertida. Reino unido, Francia, Alemania, Estados Unidos, Suíza, Luxemburgo, Bélxica, Portugal, Rusia... e, agora, en primicia absoluta para o Estado español, Ourense vibrará co son incríble deste trío que parece unha big band. Tres músicos totais que manexan coa mesma mestría os códigos do jazz clásico e da música electrónica. Música de baile para as novas xeracións.

O Festival Reperkusión abre hoxe e ata o 1 de maio a convocatoria para que artistas, grupos e compañías profesionais e amadoras presenten as súas propostas para formar parte da programación da 12ª edición do festival, que se celebrará na Cidade dos Muchachos de Bemposta, en Ourense, os días 11, 12 e 13 de xullo. Como nas edicións anteriores, a programación de concertos de noite no escenario principal, onde xa está confirmada a presenza da rumba rockeira de Muchachito y sus compadres, da percusión o movemento e a comedia visual de Crassh, dos ritmos frenéticos de Cuchufellos e do garage-punk desenfadado dos Terbutalina, completarase con música, circo, teatro, performances, pasarrúas, exhibicións artísticas e outras actividades das que se pode gozar en diferentes espazos da Cidade dos Muchachos ao longo dos tres días de festival.

Na selección de propostas para a programación de día teranse en conta a súa orixinalidade e capacidade para sorprender, o seu valor artístico e cultural e a capacidade para captar novo público, ademais da adecuación ás condicións técnicas esixidas e a capacidade do espectáculo de adaptarse á rúa e a espazos abertos. Xa podedes descargar as bases da convocatoria aquí.

En vista da boa acollida que tivo a proposta na pasada edición, este ano tamén se seleccionarán tres das propostas de día nas redes sociais do Festival Reperkusión. Os tres artistas, grupos ou compañías que reciban máis apoios serán seleccionados pola organización para formar parte da programación. O ano pasado, finalmente foron catro os elixidos polo público: Guezos, Skarallaos, La Tarrancha e Rimbarán.

O Festival Reperkusión celebrará a súa 12ª edición na Cidade dos Muchachos de Bemposta os días 11, 12 e 13 de xullo. Como ven sendo habitual no festival, será unha fin de semana completa, con actividades de día e de noite que non deixarán un momento para o aburrimento. As primeiras confirmacións do programa deste ano dan boa conta da mestizaxe cultural que nos caracteriza. Pasarán polo escenario de Bemposta a rumba rockeira de Muchachito y sus compadres, a percusión o movemento e a comedia visual de Crassh, os ritmos frenéticos de Cuchufellos e o garage-punk desenfadado dos Terbutalina. As entradas póñense hoxe á venda cunha oferta especial para as 1000 persoas máis rápidas, só ata o 15 de abril, de 20 € máis gastos de xestión o abono de tres días ou 25 €, se é con acceso á zona de acampada.

Muchachito chegará á Cidade dos Muchachos en compañía dos seus compadres: o pintaor Santos de Veracruz e o guitarrista Diego Pozo, “el Ratón”, antigo membro de Los Delinqüentes e compañeiro no G-5. Despois de sete anos sentado, Muchachito substitúe o “bombo inferno” por un invento do propio, o “Tabanco Bomb”, que lle permite bailar mentres toca, e súmase a el Ratón para darlle vida a dúas guitarras frenéticas que nos fan pensar que estamos ante un concerto homenaxe ás guitarras de rúa, a esencia do noso rock. Xuntos, repasan o repertorio de Muchachito e de Los Delinquentes e versionan algunhas das súas cancións favoritas, facendo “Rumbarock Chunait” a excusa perfecta para bailar toda a noite.

Crassh é un grupo portugués que arrasa coa súa peculiar combinación de percusión total e humor. Mesturan percusión, comedia, danza, teatro e performance nun espectáculo universal, que se adapta a todos os escenarios e públicos, sen barreiras lingüísticas nin de idade. Botas, cubos, caixas de mistos, escobas, lavalouzas, cascos, revistas, pelotas de baloncesto, tubos, o noso propio corpo… todo o que nos rodea inspíralles melodías e bailes, porque para esta cuadrilla a beleza e a música son constantes cotiás presentes en todo. Nos espectáculos de Crassh o público recibe unha enerxía contaxiosa, procedente desa concepción ilimitada da arte, que o leva a participar no movemento musical como un integrante máis da banda.

Cuchufellos é unha banda multicultural formada por dez músicos incontrolables, inconformables e inclasificables. Trompeta, saxos, baixo, guitarra, acordeón e percusión son as súas armas de diversión masiva e utilízanas sen compaixón ata compartir cada concerto nunha festa. Son vellos coñecidos do Reperkusión, onde xa soaron algúns dos seus temas, con letras en galego e ritmos frenéticos que levan ao público dende os Balcáns ata Manzaneda.

Desde a súa formación en 2010, Terbutalina non parou de tocar, de medrar y facer pasalo ben. En menos de tres anos, estes cinco monógamos e promiscuos das Rías Baixas pasearon o seu intenso garage-punk por salas, festivais e festas de todo o país. A mellor mostra do rebumbio que teñen organizado está nos seus directos, nos que non existe a marxe para o descanso.

En próximas datas darase a coñecer o resto do cartel de concertos do Reperkusión. Como nas edicións anteriores, Reperkusión 2014 será moito máis que unha suma de concertos, xa que terá programación de día e de noite con numerosas actividades abertas ao público: humor, exposicións, teatro de rúa, pasarrúas, djs, obradoiros, mercadiño e o XII encontro de malabares e artes do circo.

O Domo da Cidade dos Muchachos acolleu o luns 6 de maio a presentación da 11ª edición do Festival Reperkusión que terá lugar esta mesma fin de semana en Bemposta. Segundo afirmou Xurxo Seara, organizador do evento, Reperkusión’13 “serán tres días e tres noites de festa, preto de 60 horas de programación de todas as disciplinas e para todos os públicos, dende o venres ás 18h ata ben entrada a madrugada do domingo”. “O 80% destas actividades son libres e gratuítas”, recordou Seara, “e están pensadas para toda a familia”. Só serán de pago os concertos de noite no escenario principal, o venres e o sábado dende as 22h30 ata as oito da mañá, o resto da programación da xornada é de acceso libre e gratuíto: concertos no escenario de día, pasacalles, circo, talleres, olimpíada de malabares, mercado de artesanía... unha ampla programación o venres pola tarde e o sábado e o domingo mañá e tarde.

As estrelas desta nova edición son Fermín Muguruza, que volve de xira para celebrar os seus 30 anos de carreira musical, e Manu Chao, o referente da música mestiza internacional, que repite no festival despois das súas lembradas actuacións do ano pasado. Xunto a eles outros 22 grupos de música e artistas de humor e circo para completar un cartel de gran nivel, con nomes como Haydamaky, Banda Fura Fura, Artistas del Gremio, Shazalakazoo, Skarallaos, Guezos, La Tarrancha, Rimbarán, La Sonajera Ravalera, Chimango ou o humorista Quequé.

As entradas e os bonos para o Reperkusión están á venda a través da web www.reperkusion.com  e en puntos de venta en toda Galicia. Os bonos para todo o festival custan 30 € en venda anticipada e coutarán 35 € en taquilla. No caso dos bonos que inclúen cámping, custan 35 € en venda anticipada e 40 € en taquilla. As entradas para venres ou para o sábado custan 20 € en anticipada e 25 € en taquilla. En venda anticipada hai que engadir ao prezo os gastos de xestión. O director do Festival, Emilio Oro, afirmou que a venda vai a bo ritmo, polo que se espera repetir o éxito da pasada edición, na que máis de 21.000 persoas pasaron por Bemposta.

Cidade dos Muchachos
O Festival Reperkusión tomará unha vez máis a Cidade dos Muchachos, logo do éxito da pasada edición, cando por primeira vez se celebrou nestas instalacións situadas no municipio de Ourense. “Trátase dun lugar moi especial”, recordou Seara, “no que se desenvolveu un proxecto modélico de integración e compromiso social que tiña nas artes e no circo un dos seus piares”.

Este ano avanzouse un paso máis na recuperación das instalacións, da man da asociación Sustinea, que segundo asegurou Luís Fernández Ramos, representante do Padroado da Fundación Bemposta Ciudad de los Muchachos, “realizaron un importante labor de acondicionamento en catro fins de semana de voluntariado e convivio inesquecibles para nós”. O Festival é un punto de inflexión na “dinamización” do espazo e na recuperación do proxecto Circo dos Muchachos. Os propios muchachos participarán activamente no Festival: serán os encargados de dar os talleres de malabares que se ofrecerán cada día de 12h a 14h e farán varias exhibicións de malabares e acrobacias, das que ofreceron un petisco esta mañá na rolda de prensa.

Transportes
Emilio Oro lembrou que en Bemposta non hai espazo para aparcar, polo que dende a organización recomendan deixar o coche en Expourense e subir ata o Festival en bus. Urbanos de Ourense reforzará as liñas 14, 33 e 25A (o Moucho Bus) e porá dous buses especiais dende o Parque de San Lázaro. Todas as liñas pasarán polas inmediacións de Expourense e o Pavillón Paco Paz. Os horarios poden consultarse aquí.
 
A organización ofrece tamén a posibilidade de que a xente que vive en Allariz, Carballiño, Celanova, Lalín, Maceda, Monforte, Ribadavia, Verín ou Xinzo viaxa ata o Festival Reperkusión en bus compartido. Os buses sairían de cada unha desas cidades o venres ás 20h30 e o sábado ás 17h e voltarían dende Bemposta cada noite ás 05h30 e o prezo sería 6 euros/día, ida e volta. As persoas interesadas deben reservar praza antes do martes 7 de maio, escribindo a Este enderezo de correo está a ser protexido dos robots de correo lixo. Precisa activar o JavaScript para velo. . Os buses só sairán se hai reservas suficientes.